Broyttar reglur viðv. skatti av leiguinntøkum

Fyrr í ár varð samtykt lógarbroyting gevur húsaeigarum møguleika at verða skattaðir eftir eini 25%-bruttoskattaskipan av inntøkum av húsaleigu í staðin fyri at verða skattaðir eftir vanligu reglunum um inntøkur av húsaleigu.

Innihaldið í lógarbroytingini
Sambært vanligum skattareglum er inntøka av húsaleigu skattskyldug og skal uppgevast á sjálvuppgávu saman við aðrari inntøku. Inntøka av húsaleigu verður uppgjørd sum nettoinntøka eftir frádrátt av útreiðslum so sum EL, olja, trygging og rentur. Rentur kunnu tó ikki frádragast í inntøkuni, um talan er um hús sum, umframt at verða útleigað, eisini verða nýtt til bústað hjá eigaranum.

Sambært fyriliggjandi uppskoti fáa húsaeigarar nú í staðin møguleika fyri at velja eina 25%-bruttoskatting í staðin fyri skatting eftir vanligu reglunum. Verður hesin møguleiki valdur, skal inntøkan av húsaleigu ikki roknast við í vanligu skattskyldugu inntøkuna, men skal í staðin skattast fyri seg við 25% eftir ein botnfrádrátt uppá 24.000 kr. árliga. Um hesin møguleiki verður valdur, kunnu útreiðslur, so sum EL, olja, trygging og rentur ikki frádragast í leiguinntøkuni.

Dømi 1 - útleigan av íbúð
Niðanfyri er víst dømi um útrokning av skatti v.m. í sambandi við útleigan av íbúð í húsum, har ið eigarin eisini býr sjálvur. Rentuútreiðslur kunnu ikki frádragast eftir vanligu skattareglunum.

Tað framgongur at í hesum føri sparir útleigarin 1.497 kr. um mánaðin við at velja bruttoskatting eftir nýggju reglunum.

Dømi 2 - útleigan av heilum húsum
Niðanfyri er víst dømi um útrokning av skatti v.m. í sambandi við útleigan av heilum húsum, har ið eigarin ikki býr sjálvur. Rentuútreiðslur verða frádrignar eftir vanligu reglunum.

Tað framgongur, at í hesum føri viðførir útleigan við 25%-bruttoskatting ein meirkostnað uppá 603 kr. um mánaðin fyri útleigaran. Orsøkin til meirkostnaðin er fyrst og fremst, at í sambandi við útleigan av heilum húsum, kunnu rentuútreiðslur frádragast eftir vanligu reglunum. Hetta viðførir, at netto leiguinntøkan verður somikið lág, at skatturin, útroknaður eftir vanligu reglunum, er lægri enn 25%-bruttoskatturin, sum verður roknaður av leiguinntøkuni, uttan frádrátt fyri m.a. rentuútreiðslur.

Samanumtikið
Samanumtikið kann sigast, at 25%-bruttoskatting eftir vanligu reglunum loysir seg betri í teimum førum, tá ið útleigarin ikki kann frádraga munandi útreiðslur í leiguinntøkuni. Hetta vil serliga verða í sambandi við útleigan av íbúð, har ið renturnar ikki kunnu frádragast.

Her kann leggjast afturat, at hóast rentur ikki kunnu frádragast í inntøkuni í sambandi við útleigan av íbúð í húsum, har ið eigarin eisini býr sjálvur, so kann eigarin framvegis fáa fullan rentustuðul, eisini um skattað verður eftir 25%-bruttoskattaskipanini.

Um útleigari hevur munandi útreiðslur, sum kunnu frádragast í inntøkuni eftir vanligu reglunum, t.d. rentuútreiðslur, ella útreiðslur í sambandi við umvæling ella viðlíkahald, kann tað framvegis loysa seg at uppgera inntøkuna av húsaleiguni eftir vanligu reglunum. Ein spurningur í hesum sambandi er, um útleigari kann velja at skifta í millum, soleiðis at skattað verður eftir vanligu reglunum í teimum árum, tá ið frádráttarloyvdar útreiðslur er stórar, meðan skattað verður eftir 25%-bruttoskattaskipanini í teimum árum, tá ið frádráttarloyvdar útreiðslur eru minni. lógarbroytingin sigur einki hesum viðvíkjandi.

Lógarbroytingin viðv. skatti av leiguinntøkum er sett í gildið við afturvirkandi kraft, soleiðis at møguleiki verður fyri at skatta leiguinntøku eftir broyttu reglunum frá 1. januar 2009.

Fleiri upplýsingar kunnu fáast við at venda sær til:

Mirjam Haraldsen
Tlf. nr. 34 34 70
mharaldsen@spekt.fo

Jákup Jacobsen
Tlf. nr. 34 34 63
jjacobsen@spekt.fo